IND'U PAGLIAGHJU......

IND'U PAGLIAGHJU......

Aghju fattu un viaghju 
Chì m’hà lasciatu scopre tutte l’alme ferite
Un sintimu d’orfannu
Chì hà chjamatu oghje trà le petre sculpite 
Un ricordu invechjatu
Di tante stundarelle
Ai un gustu zuccatu 
Di castagne è di mele 

Aghju vistu un tercanu
A vita pocu strana di purezza in le mani 
Un cantu da luntanu
Chì ribombava in l’estru di li mio paisani
È tù sì diventatu
Cum’una riturnella
A vera impaghjellata 
Di cullane di stelle

Aghju intesu un rimore
Un silenziu sicretu d’un muru affucatu
Si sentia l’amore
Ancu lu passu strettu è l’orma trapassata
Risonnava in core
E veghje à lu caminu 
Ma oghje pè discorre
Ci hè l’alburu vicinu

Aghju circatu in vanu 
Inde la mio memoria una vita luntana 
Cum’un vechju veranu
Un rilogiu à l’ora chì passa pianu pianu
Mi ferma un ricordu
D’una voce lampata
È c’era un Pampasgiolu
Pè scrive à lu mio latu ...

Letizia Cosimi