È A PIUMA....

È A PIUMA....

Cum’un raghju di lume chì rinasce à l’albore
Caccià u negrufume chì campa à tutte l’ore 
Tù sì la mio furtuna chì m’aiuta à discorre 
O la mio cara piuma sì prufumu d’amore

Cum’un cantu sicretu chì sussura à lu mondu 
Un aria ch’aghju in pettu è versu le mio sponde 
Tù mi conti l’affettu di le vechje canzone
Aghjunghju le mio lettere è nasce lu culombu 

È tù l’inchjostru neru, calcina furibonda 
Cum’un sonniu legeru di l’anima prufonda 
Scrivendu à l’addisperu e veghje vagabonde
Sì un soffiu sinceru chì vole currisponde

Cù lu vechju battellu chì pregha lu ritornu
Aspettendu l’acellu ingiru à lu cuntornu
Tù sì un fiumicellu chì nasce ogni ghjornu
È apre lu purtellu di l’alme à l’intornu 

O pagina legera stà à sente u volu 
Di la pium’in preghera chì canta sola sola
Una canzona era è oghje cum’un sole 
A più bella manera di cuntà le so fole...

Letizia Cosimi.

Source photo : babilown.com