A ELLI.

À elli

Sò tutte vistute di biancu
Anu u visu fasciatu
Si movenu à passu lestu
È intornanu u malatu
Incù un pinseru maiò
Chì hè in gattivu statu

Lottanu senza risparu
Cunniscendu a so sorte
È in ghjunghjendu à l'ospidale
È francatu e so porte
Facenu fronte à u nimicu
A salute o a morte

Mettenu a so vita in ghjocu
Pè francà tutta sta ghjente
Pocu importa qual' chì fussi
Incunnisciutu o parente
Lottanu addispirate
Ch'ùn sanu fà altrimente

Ssi fiori di giuventù
Sò pronte à perde a vita
Chì u so solu pinseru
Hè di vince a partita
Tistimoni noi li divemu
Ricunniscianza infinita

A sera vultendu ind'è elle
Fendu cenni casani è passendu un bellu mumentu
Cherenu un picculu riposu
Quandu u lume s'hè spentu
Nanzu di u so primu sonnu
Isbuccia un rapidu pientu

Ogni sera sciaccamanate
Pinsendu à i sacrifizii resi
È tutti l'anni u 5 marzu
Ind'è tutti li paesi
A notte in piazza à e ghjesge
Sianu i gran'fochi accesi.

Ghjuvan Andria Acquaviva dettu Capitanu, u 5 aprile 2020

Photo : © AFP

Merci à Jean-Luc Luciani et Barnàldu Pazzoni