L'ALIVU.

L'ALIVU.

Carcu di storie arradicate
Ne sò un emblemu ardente
Chì ancu a Dea m'hà chjamatu
"Omu" di qualità pudente

Aghj'un bellu fustu zuccatu
È tante fronde persistente
Chì sò un alburu cacciatu
Da tutte 'sse fole brusgente

Cù lu mio fruttu arrusgiulatu
Da le vostre mane bullente 
Pé riscaldà sò adupratu
È lu mio suchju pè surghjente

Di lumirella eiu sò statu
Ancu curona d'ornamentu
È mentr'un soffiu affuatu
Cù le mio rame in muvimentu

Ma oghje ne sò minacciatu
D'una malatia viulente
Sapete chì sò spenseratu
È la mio alma hè cuscente

D'issu dannu chì hè diventatu
Attu d'un'ultima viulenza
Ùn vogliu esse cundannatu
Ma sentite la mio sperenza

Chì chjama lu vostr'antenatu
È pregha un raligramentu
Cù lu so cantu addisperatu
Ne sguasserà lu mio scumpientu...

Letizia Cosimi