MA QUÌ.
Ma quì...
Ci so tutt’e storie
Quelle arradicate senza manc’un orgogliu
Ci so quant’e vittorie
Quelle smenticate duve ne so custodiu
Eppo ci hè a fierezza
D’issi passi straziati
Sempre cù tennerezza
‘Ssi mumenti liati
Ma quì...
Ci so certe canzone
Chì cantanu l’amore in tuttu lu rughjone
Ci so e tradizione
Chì dicenu in core cù tante cumpassione
Eppo ci hè l’amarezza
Di l’amori passati
È cum’una scumessa
D’issi tempi bramati
Ma quì...
Ci so i paisoli
Appesi à e muntagne è à spià l’albore
Ci so i machjaghjoli
Chì cum’è un orfannu sunnieghjanu l‘ore
Eppo ci hè a richezza
D’issi lochi scurdati
Sempre una dulcezza
À li mio vechji andati
Ma quì...
Ci hè anc’una paghjella
Spartuta à lu to latu è ch’aghju sempre in pettu
Cum’una riturnella
Un versu cundannatu chì mi face dispettu
Eppo ci hè a tristezza
Ricordi abbandunati
Un’ultima carezza
À scrive l‘innamurati...