L' ARBURU DI U PANE.

L' ARBURU DI U PANE.

M'arricordu cù fervore
Di lu nostru antenatu
Chì cumbattia l'invasore
'Ssu Corsu era suldatu

Tù mi devi un tal'onore
Chì accant'à tè so statu
Un testimoniu di valore
Cum'un veru cundannatu

T'aghju datu cù ardore
Lu mio fruttu inzuccheratu
Pè diventà traditore?
È eiu so statu fidatu

Serai un impustore?
Ne aghju persu lu fiatu
M'ai tombu senza rimore
Lu mio cantu s'hè firmatu

Senti oghje u calore?
Di lu to gestu smisuratu
Mi tengu in core u timore
D'esse torna attempatu

Cun tè, senza rancore
Mi ne steraghju à lu to latu
È preghu à u Signore
Di esse sempre liatu...

Letizia COSIMI