U PASTORE.

U PASTORE.

Barretta misgia bella incalfata
Cù la mio pippa sempre imburrata,
Fisculellendu quì è culà
Portu le capre à pasculà.

Barretta misgia nant'à l'arechja,
Cù lu pilone è la sacchetta,
Cun lu me cane, u pediolu
Curu le capre per Niolu.

Ghjuvan Martinu mio fratellu
Este partutu pè lu battellu,
Sta mane in Francia si n'hè andatu
In un'usina s’hè impiegatu.

Ma preferiscu le campagne,
È l'aria pura di le muntagne,
Nanzu lu chjostru cun lu stazzale
Ch'esse impiegatu à l'arsanale.

U latte biancu, u casgiu frescu,
Un bellu brocciu cù lu caprettu,
Ne campa tutta la mio famiglia
Di l'impiegati ùn aghju inviglia.

Eo sò Francescu u spensiratu
Sempre cuntentu, mai pressatu.
Cù lu me cane, u pediolu
Curu le capre per Niolu.

Chanson de Charles Rocchi.