Balagne.

U CELU DI BALAGNA.

Vecu u Monte Grossu da e stelle fiuritu
Da Zilia à Felicetu incù l’estru muntagnolu
Un acellu di notte chì d’amore si lagna
Tandu mi vene in core u celu di Balagna (bis)

L’Isula a turchina face chjami è rispondi
Incù Santa Riparata chì fideghja à Munticellu
L’estru di i mio lochi mi fraglia di cuccagna
Tandu mi vene in core u celu di Balagna (bis)

Da a valle di Tora u verde di l’alivi
Mi stuzzica a mente è Muru stà in pughjale
Sentu cantà a rota di millaie di fragni
Tandu mi vene in core u celu di Balagna (bis)

U pinzu di a Vella pare muru di petra
Fruntiera naturale trà Nesce è Spuncatu
Vecu pagliaghje bianche cum’è mure di Spagna
Tandu mi vene in core u celu di Balagna (bis)

U timpanu latinu d’una schilla luntana
Brusgia a mio memoria d’un’ aria vagabonda
E capine chjinate mi sò palazzu giallu
Tandu mi vene in core u celu di Balagna (bis)

Reginu maestosu di rabbia si ne scappa
Di Lozari vicinu cerche l’ochju barcale
E mio loche sicrete sò di piaghje è muntagne
Tandu mi vene in core u celu di Balagna (bis)

© "U Celu di Balagna" - Dédé Nobili - Paul Felix Nasica - album "U Mio Cantu"

La Balagne remercie I Chjami Aghjalesi d'en autoriser sa publication...

Photo : Philippe Lagain